Jesuh Khrih Teinak Cu Kan Teinak

Missionary (Pathian Rianṭuantu) Pakhat Ka Si Ah Cun

Biahmaiṭhi

Mission a silo ah Missionary ti mi biafang hi a chim a fawi ngai nain Mission i a rian a si mi thlah mi rian va ṭuan cu a har ngai mi a si, tiah an chim tawn. Cu caah missionary pakhat ka si ah cun kan rianṭuan mi ah ka tlamtling dih lai i kaa lawm ngai lai, ti cu kaa ruah chih ngam hrimhrim lo. Sihmanhsehlaw cu vialte harnak cu hngal in Pathian fial mi rian cu ṭuan a si ko lai. Minung ṭhawnnak silo in Pathian ṭhawnnak bochan bu in ta!

Mission timi cu:

Mission timi biafang cu Khrihfa hna nih kan rak ngeih mi biafang a si lo. Kan Baibal chung zongah mission timi biafang cu kan hmu kho fawn lo. A sinain mission ti mi biafang he aa khat ngai mi “Lamkaltu” ti mi baifang cu a um. Lamkaltu hna cu Jesuh Khrih nih Nawl a pek hna bangin vawlei cung hmunkip ah rian an ṭuan. Phundang cun thlah mi rian a silo ah Nawlpek mi rian an ṭuan. Thlah mi rian a silo ah Nawlpek mi rian cu mission rian kan ti mi cu a si ko. Nawlpek mi rian a silo ah mission rian cu Lamkaltu hna nih an ṭuan. An ṭuan mi Pathian rian ah khan an nun an pek. Lamkaltu hna cu missionary hrimhrim an rak si.

Missionary pakhat ka si ah cun:

Cu sining he pehtlai in Missionary pakhat ka si ah cun, Lamkaltu hna keneh a zul mi ka si ve hnga. Missionary pakhat si cu a sunglawi mi le man in khiah khawh lo mi Pathian laksawng a si ko. Zeicatiah an nunnak cu Pathian sunparnak caah hman a si. Lamkaltu hna nunnak kan zoh tikah an ṭuan mi Pathian rian ah cohlan awk le a nung mi pekchanhnak in an i pechan. Keizong missionary pakhat kan si ah cun Pathian rian ah aa pumpe mi le Lamkaltu hna nih Pathian rian an ṭuan ning hi ka caah hmanthlak a si ko. 

David J. Bosh nih a chim mi cu, “Mission rian kan ṭuan kan ti tikah vawlei ah mission a ṭuan mi Pathian sinah kan va i tal ve i a rian kan va ṭuan ve khi a si ko,” tiah a ti. Nihin ah khua a ka ruah ter ngai mi cu Pastor cheukhat le Khrihfa a cheukhat nih, Jesuh Khrih a zum lo tu hna sin i Pathian rian a ṭuan mi (Missionary) hna cu an thlanglamh deuh hna. An thlanglamh hna nak hi chim ah cun a tampi lai. A tampi lak ah pakhat aa tal mi cu, missionary pakhat a thlahlawh hi Pastor a ṭuan kaa mi thlahlawh hmanh a tluk lo. A taktak ah cun missionary pakhat cu Pathian he rian a ṭuan ṭi mi an si hi kan philh lo ding a si. Kan dawt hna le kan upat hna ding a si. 

Kei zong Pathian rian i va i tal ve cu saduh ka that ko. Pathian he hmunkhat i rianṭuan ṭi mi si cu ka duh hringhren ko. Pathian rian (Mission) ṭuan dingah ka ral a chialo, ka tha zong a chialo i ka thin zong a phang lo. Zeicatiah Pathian a um, a khrihfabu le a salpa keimah kan i fonh i a rian kan ṭuan a si ah cun siasal pennak cu ka tei hrimhrim lai. Cu ti siasal pannak kan tei hnu zongah Jesuh Khrih thisen man kan sinak cu ka dirpi hrimhrim lai. Khuaruah-har a si mi cu, Pathian dawtnak i a muru a si mi Jesuh Khrih thisen man kan si, hi a si. Jesuh Khrih thisen man kan sinak cu ka ṭhutpi sawh lai maw? Kaa theihter lai lo dah! Cu ti kaa theihter lo i ka ṭhutpi ko ah cun midang nunnak zawn a ruat lo mi le mah zawn lawng aa ruat mi ka si hnga. Zei a si hmanh ah Jesuh Khrih thisen man kan sinak cu kaa ṭhutpi sawhsawh kho lai lo.    

Pastor Tawk Lian nih a chim mi ka philh khawh lo mi cu, “A tu ah hin ka nunnak hi hei dih sehlaw vanram ah khin ka hei kal hnga i Lamkaltu hna lak ah Paul hi a kut ka tlaih hmasa lai. Cun bia ka ruah hnga i, ‘Paul__na cakuat hna kha ka rel pin ah na konglam hna kha tampi ka rel i cu nih cun thazaang tampi an ka pek. Pathian rian ka ṭuannak zongah thazaang tampi an ka pek. Na cakuat in mitampi zong kha thazaang ka pek ve hna. Na cungah kaa lawmtuk’ ka ti lai,” tiah a ti. Langhter ka duh mi cu, Paul cu missionary hna nih zohchunhawk hmaanthlak a si hrimhrim ko. Jesuh Khrih kawhauhnak a hngal mi si ko hmanhsehlaw nunnak pek tiang in Pathian rian a ṭuan ngam mi a si hi zohchuhtlak a si. Paul cu, Judah phung thiam minthang, Judah mi hna cathiang a hngal dih tu le vawlei cung khuasak nak ah thinphan ding a ngeilo mi pa a si nain cu vialte cu kaltak in Jesuh Khrih thisen man kan sinak cu hmunkip ah a aupi ko, a nun a dongh tiang in.

Nihin ah hin hringtu nu le pa nih dawt mi fapa ngeihchun si ko hmanh ning, vawlei cung nu le pa ngeihchiah chawva vialte rocotu hei si ko hmanh ning law Jesuh Khrih nih Nawl a ka pek mi (mission) rian cu ka ṭuan ko lai. Jesuh Khrih thisen man kan sinak cu ka aupi ko lai. Paul nak in a lat thong tampi in a hme mi keimah nih Jesuh Khrih Nawlpek mi rian cu kan ṭuan hrimhrim awk a si. Ka ṭuan lo ah cun taksa thih hnu zungzaal nunnak ka phak tikah khin kan Bawipa hmai cu chim lo, Lamkaltu hna le missionary hna hmai hmanh ah ka dir ngam hnga maw? Ka dir ngam lai lo! Ka dir ngam hrimhrim lai lo! Bawipa Nawlpek mi rian cu ka ṭuan ko lai. Cu ti Bawipa Nawlpek mi (mission) rian ka ṭuan khawh a si ah cun, keimah ṭhawnnak si lo in Bawipa ṭhawnnak bochan bu in a si lai. Keimah ah thil tikhawhnak a um lo, Bawipa lawngah thil tikhawhnak a um ti ka hngalh.

Biadonghnak

Mission rian he pehtlai in kaa timhtuahnak cu Bawipa sinah hitihin thlacamnak ka ngei, “Bawipa, na rian ah i tal ve ding in kaa timhtuahnak hi ka hngalh piak ko. Kei cu na sal ka si__na sal vialte lak ah a hmebik ah ka cohlang law ka zaagfah ko. Na ka pek mi nunnak hi na caah sullam ngeih ter law, na sunparnak caah hmang ko. Na Fapa Jesuh Khrih thisen man kan sinak a hngal lo mi hna nih a nin hngalh i a ngantuk mi na Dawtnak le na Vel an cohlan khawhnak lai ka nun hi hmang ko. Keimah duhnak nak in Bawipa na duhnak bang si ko seh. Jesuh Khrih min in thla ka cam__ka Bawipa le ka Pathian__Amen.”