BAWIPA TA KAN SI

BAWIPA TA KAN SI

Adam Hre

Biahmaiṭhi

Nihin i kan ton mi harnak chungah Bawipa nih a kan tuarpi i kan ṭahnak le kan hrum-ainak ah a kan umpi ko. Zeizong za a hngal i a kan umpitu Bawipa nih a dawtnak a samh ko. A kan umpi zungzaltu Bawipa a vel cu kan caah a za ko. Nunnak le damnak hna hi Bawipa ta an si i kan nun ah siseh, kan thih ah siseh, kan dam ah siseh, kan zawt ah siseh Bawipa ta kan si. Cu nih cun ka hna a ngamter!

Ishmael Ṭahnak A Theitu Bawipa (Gen 21: 9-21)

Ishmael le a hringtu a nu Hagar cu a pa Abraham nih a ṭhawl hna i ramcar chungah thihnak thlichia nih a den hna. Khuazei in dah bawmhnak kan hmuh lai, tiah Hagar le Ishmael cu an ṭap. Hagar nih a fapa dawt Ishmael harnak tihal tuar in a thih lai a ruah ah a tuar kho hrimhrim lo, a thih hmuh duh lo ah thal kah phak hrawng khin hrumai pah hacangrial in a fapa dawt thih lai a hngah ko. Ishmael nih a hringtu a nu a ṭah pah le tihal tuar in a hram ruangmang ve. An nu fa in an nun cu khuaci a mui ko. Sihmahsehlaw dawtnak Pathian nih Ishmael ṭahaihram thawng cu vancung in a run theih. Pathian nih Hagar cu a mit kha khua a hmuhter i tikhor pakhat a hmuh. A va kal i ti thawl khan ti cu a va then i ngakchiapa kha khim tein a dinh. Ngakchiapa cu Pathian nih a umpi i sakah thiam ngai mi a hung si. A nu nih Izipt ram in nupi a ṭhitpiak.

Kan Harnak A Thei I A Kan Bawmtu

Nihin i vawlei nih a chuhpi mi zawtfahnak le kan tuarinnak hna hi Ishmael le hringtu a nu Hagar nih an tuarin bantuk ko khi kan hluan. Vawlei nih a chuahpi mi Covid-19 zawtnak ruangah khuaruahhar vansang in a um mi unau hawikom dawt kan tam ko. Khuazei in dah bawmhnak ka hmuh lai, tiah van kan zoh ah a sang vawlei kan zoh ah a pit. Mi cheu cu zawnak ruangah ruahchannak a dong. Mi cheu cu zawtnak ruangah chungkhar an tling ti lo. Sihmanhsehlaw Bawipa nih a kan philh hrimhrim lo. Kan ngaihchiatnak mitthli le kan tuarinnak ruang i kan aunak aw cu Bawipa nih van cung in a run theih hrimhrim lai.

Ishmael le hringtu a nu Hagar cu Pathian nih an ṭahnak a theih piak hna pinah him tein an nun a ven hna i ramcar chung in ti a pek hna, ṭihnung mi thihnak chung in a chanh chuah hna. Nihin i kan tuar cuahmah mi zawtnak (Covid-19) ruangah hin Pathian cungah ka hna a ngam. Zeicatiah Pathian nih cun a kan hngalh dih ko, kan samfa fakhat tiangin a hngal dih tu pei a si cu. Ishmael nunnak nih ramcar chung in a herh tuk mi ti a petu cu Pathian a si. Kan herh tuk mi cu nihin i kan zawtnak le kan harnak chung in luatnak hmuh hi a si(Covid-19 ruangah). Pathian nih kan herh tuk mi luatnak hi a kan pek ko lai. Zeicatiah Pathian cu harnak caan ah a kan umpi i a kan bawm zungzaltu a si.

Harnak Chung In Thluachuah

Ishmael cu Pathian nih harnak chung in a chuah pinah a umpi i thluachuah a pek. Ishmael cu sakah thiam ngai a si pinah a nu nih Izipt ram in nupi a ṭhit piak. Cu vialte sining nih a langhter mi cu, Pathian nih Ishmael cu harnak chung in a khamh i thluachuah tampi a peknak kha a si (Gen 21:20-21).

Nihin ah Pathian nih harnak chung in tlau lan ding hi a kan siang hrimhrim lo. Pathian nih cun nifa kan nunnak ah harnak chung in chanhchuah i thluachuah tampi pek tu hi a kan duhpiak deuh mi a si. Pathian dawt mi fa le hna i kan donghnak hi harnak le temhinnak ah a rak dong mi a si lo. Pathian nih a kan chiahpiak mi thluachuah kan va tinconak ah khin a si te lai. Cu thluachuah cu kan i ruahchan zungzal mi (zungzal nunnak) cu a si.

Khualtlawng Tarnu

Voikhat cu Franc (Pin-tit) ram in Italy ram ah tilawng in mi tampi khual an tlawng. Cu lio ah cun thlichia le tilat fak ngai in a tho. Mi tampi cu an tli an zam nain tilawng kam te ah tarnu pakhat hnangam ngai in a um ko kha kawifa hna nih an hmuh. Kawifa hna nih tarnu an zoh ah an khuaruah a har tuk. Cu tarnu cu an va kal hnawh i, “Ziah! Hnangam ngai in na um ko thlichia le tilat lak ah,” tiah an ti. Tarnu nih cun, “Nihin i thlichia le tilat lak ah ka nun i ka luat ah cun Italy ram ah a um mi ka fanu sinah ka phan lai. Sihmanhsehlaw nihin thlichia le tilat lak i ka thih ah cun ka Bawipa Jesuh Khrih sinah ka phan lai,” tiah a ti hna.

Biadonghnak

Nihin kan nunnak hi vawlei harnak thlichia le tilat (Covid-19) lak i a nung mi kan si lio ah a kan umpitu le a kan bawm zungzaltu Pathian a um ko. Kan nunnak a ngei i a uk tu Pathian a um ko. Nihin i kan ton mi vawlei harnak (Covid-19) hi kan donghnak a si hrimhrim lo. Kan donghnak cu Pathian thluachuah ah khin a si i, hi vawlei harnak chung in ka nun a si ah cun ka dawt mi ka chungkhar he khua ka sa lai. Sihmanhsehlaw hi vawlei harnak chungin ka thih ah cun, ka Bawipa Jesuh Khrih sinah ka phan lai. Kan nih cu Bawipa ta kan si!