Adam Hre
Biahmaiṭhi
Nihin
vawlei caan sining kan cuanh tikah, kan caan hi caan chia a si ti cu al awk a ṭhalo.
Nunnak zong hi man ngeilo bantuk ah a cang. Vawlei hmun khua za__miphun kip nih
Covid-19 zawtnak ruangah thinphan le thlalau a dailo. Micheu cu zawtnak ruangah
an nunnak a liam i an ruak humh ngamlo in fim hlawm an si. Hi lio theng te ah
hin miphun kip nih “Pathian, khawikaa dah na um?” kan ti cio. Cu pinah,
“Pathian dah tilo cu…,” tiah kan ti. A si! Bawipa cu kan himnak a si.
Kei cu Covid-19 nih ka lungput a
thlen ko. Covid-19 a rak chuah hlan ah cun, midang cungah dawtnak, zaangfahnak
le Pathian i bochannak a rak tlawm ngai. Covid-19 nih mitampi a thah thluahmah
hna hnu cun midang cungah dawtnak, zaangfahnak le Pathian i bochannak hna cu
tam chinchin in a ka ngeihter. Nihin i kan ton mi zawtnak chia Covid-19 ruangah
nang na lungput aa thleng ve maw? Na lungput aa thlen ning cu tah, mah
zawnruahnak lawng tein maw aa thlen, midang zawnruahnak tu in dah aa thlen? Na
lungput aa thlen ning vun i dap ve tuah!
Midang
Dawtnak
Covid-19
zawtnak ruangah ka ngeih mi dawtnak a ṭhang. Cu dawtnak cu ngakchia ka si lio
in nihin ni tiang Khrihfabu ah an kan cawnpiak peng mi kha a si. Pakhat le
pakhat i dawt ding cu ka rak theih lengmang nain ka rak i fiang taktak lo.
Nihin ah cun mi dang cung ah dawtnak va chiah ding cu ka rian a si ka ti cang.
Cu bantukin midang va dawt ding cu kan Bawipa Jesuh Khrih hrimhrim nih a kan
cawnpiak (Mtt 22:39).
Nihin ah pakhat le pakhat kan i daw
kho maw? Minung pakhat le pakhat kan i dawtnak cu harnak le sungh zatlaknak kan
ton caan i kan va i bawmhnak ah khin a lang tawn. Nihin kan vawleipi (Covid-19
in) a damlo caah miphun kip harnak kan tong. Miphun hmete a si mi Chin miphun
chung zong ah Covid-19 zawtnak cu a um ve cang. Phundang cun, Covid-19 zawtnak
ruangah miharsa kan tam cang lai. A hlei khun in Paletwa ralzam kan hawi dawt
hna cu an harnak le a tuarinnak a fak chinchin cang lai. Hi caan lio te ah hin
dawtnak kut kan samh a herh ko hih. Cu pin ah kan pawngkam i a um mi hmei nu,
hmei pa le sifak ngakṭah hna caah bawmhchanh duhnak mitbenh kan i benh a herh
cang.
Kan Bawipa Jesuh Khrih zong nih
taksa zawtfah le harnak a tuar mi hna va bawmhchanh cu a kan fial ve. Luka 10:25-35
kan rel tikah damiah nih thilo nunglo in an tuk mipa a tuamhlawmtu Samaria miṭhapa
kong kan hmuh. Cu chungah kan hmuhmi Samaria miṭhapa nun hi dawt nun taktak, mi
dang sinah a lang mi nun a si. Damiah nih an velh mipa cungah Tlangbawi, Levi
pa le Samaria miṭhapa nih an khuaruah ning aa dannak kha Martin Luter King Jr
nih hitin a chim, “Tlangbawi le Levi pa nih cun an velh mipa an hmuh tikah
hitihin khua an ruat¬¬, hipa hi kan bawmh ah cun kan cungah zeidah a tlung lai?
an ti. Sihmanhsehlaw Samaria miṭhapa nih a ruahmi cu, Hipa hi ka bawmh lo ah
cun a cungah zei harnak dah a tlung chinchin lai? ti a si. ” Cu bantuk dawtnak
nih cun innchungkhar, Khrihfabu le zatlang cawlcangnak a damter.
Nihin ah zeibantuk dirhmun dah kan i
thim lai? Covid-19 le dothlennak ruangah kan vawlei le kan miphun a dam ti lo. Kan
pawngkam ah Covid-19 zawtnak a karh chin lengmang kho. Cu lawng hlah, kan Chin
ram ah AA le Kawl Ralkap kar i kahdohnak a zual chin lengmang. Kahdohnak
ruangah ralzam an tam chin i Covid-19 zawtnak ruangah a zaw mi an karh kho. Cu
ruangah eidin ti rawl khim le khat in aa hmuhlo mi kan pawngkam ah an tampi
lai. Phundang in cun, damiah nih velh mipa bantukin fahkohnak le harsatnak a
ing mi an tampi cang. Hi caan ah hin nangtah zeidirhmun ah dah na dir lai? Tlangbawi
pa dirhmun maw? Levi pa dirhmun maw? Siloah Samaria miṭhapa dirhmun dah? Kei cu
dawtnak nun a ngei mi Samaria miṭhapa dirhmun hi kaa thim ko.
Midang Zaangfahnak
Nihin
kan vawlei khua caan sining le thawngpang ruangah midang cungah zaangfahnak ka
ngeih mi a ṭhang chinchin. Zaangfahnak ka ngeih mi nih mi derthawm hna, mizaw
hna le misifak hna bawmhchanh duhnak lungput a ka ngeihter. Zaangfahnak ka
ngeihnak cu mi derthawm hna, mizaw hna le misifak hna ka va bawmhchanh hna nak
ah khin a va lang te hnga. Midang cungah zaangfahnak a ngei mi kan si ding cu Pathian
nih a kan duh piak mi a si. Zeicatiah Pathian hrimhrim cu zaangfahnak in a khat
mi a si.
Pathian sal ṭha Paul nih a kan chimh
mi cu, “Cucaah ka u le ka nau hna, Pathian nih a kan zaangfahnak a nganmi
ruangah hin, Pathian sinah a nung in pekchanhmi raithawinak bantukin i pe tuah
u; a rian ah aa pumpe mi le cohlanawk tlakmi si tuah u; cucu biaknak taktak
Pathian nan pek awk biaknak cu a si. Hi vawlei kal ning hin kal lengmang ve ti
hlah u, sihmanhsehlaw cunglei in Pathian nih nan lungthin kha a dih umnak in in
thleng hna seh. Cu tikah a ṭha mi thil le Pathian nih a lawmh mi thil le a
tling mi thil kha nan hngalh khawh lai, cucu Pathian duh mi an si,” tiah a ti
(Rom 12:1-2).
Paul nih, kan cungah Pathian
zaangfahnak a ngan bantukin midang cungah zaangfahnak a ngei ding kan si ve awk
hi a kan forhfial. Pathian nih a kan zaangfahnak a ngan mi ruangah hin Pathian
sinah a nung in pekchanh mi raithawinak bantukin kan i pek a herh. Cohlan
awktlak mi raithawinak bantukin kan i peknak cu a rian ah a langh a herh. Pathian
fialmi rian cu mi derthawm hna, mizaw hna le misifak va bawmhchanh khi a si ko.
Cu bantuk minung a bawmchan mi hna nun cu zaangfahnak nun a ngei mi cu an si.
Zaangfahnak nun a ngeilo mi nih cun midang an bawmchan kho lo tinak a si.
Nihin kan vawlei zoh tikah
zaangfahnak nun a zor chin lengmang. Mi tampi cu mah lawng an i hmu cang i an
pawngkam ah a um mi sifak le miharsa an hmu ti hna lo. Mah siaremnak lawngah an
mit an au i pawngkam siaremnak ding ah cun an mit an i chinh. Cu bantuk nun ning
cu Pathian nih a kan duhpiak mi a silo. Hi vawlei kal ning in a kal lengmang mi
hna nun ah kan hmuh khawh mi a si. Nihin ah nangtah zeidah na thim lai? Hi
vawlei kal ning in kal ve lengmang hi maw, a siloah Pathian sinah cohlan awk a
tlak mi raithawinak bantukin i pumpek hi dah?
Pathian Bochannak
Pathian
cu kaa bochan ko. A zungzal in kaa bochan ko lai. Nihin kan vawilei thawngpang
nih Pathian kaa bochannak a ṭhawnter chinchin. Zeicatiah Pathian cu kan pawng
te ah a um zungzal i nihin kan harnak vialte a kan tuarpi tu a si. Harnak le
zawtfahnak a kan tuarpi tu Pathian nih kan nun lam a kan hruai lai i vawlei
harnak le zawtfahnak vialte a kan teipi hrimhrim lai. Zeicatiah vawlei a teitu
Pathian a si. Cu Pathian cu lungawiṭawmnak zeihmanh ngeilo in ka zumh!
Pathian hrimhrim nih, “Ṭhawnnak cu
Keimah ta a si i dawtnak ka ngeih mi cu a fek,” tiah a ti (Slm 62:11). A ṭhawngtuk
mi Pathian nih lam a hruai mi kan si hi kan i lawmh awk a si lengah kan i
bochan hrimhrim a herh. Cu caah Siangpahrang David nih, “ka mi hna, Pathian cu
i bochan zungzal u! Amah cu kan himnak a si caah nan harnak vialte kah chim dih
u,” tiah a ti (Slm 62:8). Kan himnak cu Pathian lawnglawng a si caah kan i
bochan hrimhrim awk a si. Nihin i kan zawtnak le kan fahnak vialte hi Pathian
sin ah chim dih ko usih. Dawtnak in a khat mi Pathian nih a kan bawmh hrimhrim
lai. Pathian dawtnak cu a sermi thil vialte cungah zungzal in a hmun ko (1Cha
16:34).
Pathian kan i bochannak hi zeitindah
kan langhter lai? Pathian cu kan zumhtuk caah Covid-19 zawtnak lak ah kan vak
ko lai maw, cozah nawl ngai tein dah kan um lai? Micheu cu Pathian kan i
bochannak a ngan tuk caah Covid-19 zeirel lo in kan lung duh in kan um. Cu
bantuk sining cu a si awk a si hrimhrim lo. Pathian kan i bochannak cu cozah
nih a kan hruainak tang le rikhiah mi chung i kan umnak in kan langhter awk a
si. Zeicatiah cozah cu Pathian nih mizapi hruaitu si dingah ṭuanvo khinh mi an
si caah a si.
Israel miphun tuanbia kan zoh tikah
mizapi nih hruaitu nawl ngaih hi a biapi ngai in kan hmuh khawh. Israel mizapi
nih Pathian an ṭihnak a langhnak cu hruaitu hna nawl an ngaihnak ah hin a si. Cu
bantuk cun Israel mizapi nih Pathian nawl an ngaihlo nak a langhter tu cu hruaitu
hna nawl an ngaihlo nak ah hin a si ve. Israel mi hna nih Pathian an bochannak
a zor i mah duh in an nun tikah sungh zatlaknak an ton i micheu cu an nunnak a
liam. Nihin ah Israel mi hna tuanbia hi kan thlalang si ve hram seh.
Biadonghnak
A
cunglei i ka langhter mi hi COVID-19 nih ka lungput a thlen mi chung in a si.
Kn ruah dingah, caan chia chung i kan nunnak ah hin midang cungah dawtnak kan
ngei maw? Zaangfahnak tah kan ngei maw? Pathian bochannak tah kan ngei maw?
Caan chia chung i a nung mi kan si caah kan nunnak hi midang caah a nung mi kan
si a herh. Midang caah dawtnak le zaangfahnak tampi in kan langhter caan a si. Pumpak
hrimhrim a hlei in Pathian kan i bochan i kan i hngatchan a herh caan a si. Kan
nun hi Pathian sunparnak caah si ko seh, tiin hi capar hin kan sawm.
Na
cungah daihnak um ko seh!
Comments
Post a Comment