CCU CAAH KA SADUHTHAH

CCU CAAH KA SADUHTHAH

Adam Hre

Zaanlei sang Ni a tlak kaa te ah khin lam ka leng i cu lio ah cun CCU zong lam a rak leng ve. CCU he cun hmunkhat ah lam kan leng i bia zaa kan i ruah. Bia kan i ruah mi chung in tlawm te hun langhter ve ka duh. CCU nih a lung chung i a um bia a ka ruah mi cu:

1.      Pangpar cing u!

CCU:         Adam Hre, saya te lak i mi pakhat sinah lawmhnak bia chim ka duh ko. A mah cu Pastor Dr Siang Zi an ti maw cu? Minung um kalnak poh ah “I Love You” pangpar pawl kha a cin hna i pawngkam aa dawh hringhren. A tu bantukin kan i chawh i lam kan len tikah pangpar hna nih kan lungthin a damter lengah lungthin a nuamh ter ngai ka ti. Cu lawng silo in sianghleirun innpi zong hi a dawhter na ti ko lo maw? 

Adam Hre: Si ee, Pastor Biak Hlem le Sayamah Par Ku zong nih pangpar an cin ve. Pangpar hi Pathian nih rak ser hlahsehlaw vawleipi hi a chambau ngai lai, tiah ka rauh. 

CCU:           A si! Ruahnak cheuh kan duh ko. Sianghleirun pi hi pangpar dum bantukin si kho sehlaw tiah saduh ka that. Khuasik caan ah phaizawng par an par hnga i ṭhal caan ah vauruang par an par hnga. A si khawh ah cu caan sau a par mi, a thlathla in a par mi pangpar pawl kha cing ulaw a ṭhatuk hnga, ka ti.

Adam Hre: A si, ruahnak na ka pek mi a ṭhatuk, kaa lawm tuk fawn. Ngaknu pakhat aa dawhnak cu pangpar tel lo in cun a tling mi dawhnak a si lo, an ti bang sianghleirun pi zong hi pangpar tel lo in cun a tling mi dawhnak a ngei bal lai lo ee….

Pangpar hi Pathian nih rak 

 ser hlahsehlaw vawleipi hi

a chambau ngai lai, tiah ka rauh

            2.      Ei awk a ṭha mi thingthei kung cing u!

CCU:          Nan sianghleirun hmunhma vawlei hi a kau ngai nain far kung le burbuk men a si. Vawlei hmun ka zoh ah hin a pamtuk ka ti. Hei si kho sehlaw vawlei ṭhatnak le hmunhma chiat deuhnak ah khin ei awk a ṭha mi thingthei kung cing kho hna ulaw a ṭhatuk lai ka ti ee.   

Adam Hre:  A si tak! Ma cu zeibantuk ei awk a ṭha mi thingthei kung cing usih law a ṭhat hnga?

CCU:          A si khawh ah cun, Me-mu kung, Thaw-pet kung, Mei-tei kung, chuchu-ma kung, Pear kung le Tet-aye kung tibantuk ei awk a ṭha mi thingthei kung hna hi cin ah a ṭha. Hi thingkung hna hi a kihnak hmun le vawlei ah a vui mi thingthei kung pawl an si.

Adam Hre: Na ruahnak a ṭhatuk ee. Sianghleirun ah kan cawn mi Ecology subject cawnpiak ning he aa pehtlai ngai. Thingkung kan cin hnga i thingkung nih a chuahpi mi thli thiang cu minung nih kan dawp lai, a theitlai zong kan ei khawh fawn lai. 

  

CCU:        Si ee…! Bia ka theih. Sianghleirun i ca an chim tu hna saya pakhat nih, “Vanram ah khin ei khawh mi thingthei kung le thingthei a um lo ah cun Vanram kai ka zuam lo,” a ti, an ti cu a si maw?

Adam Hre: Si ee. Kan Saya nih a chim duhnak zong kha ruah a phu ngai. Hei si kho sehlaw, kan sianghleirun pi ah hin ei khawh mi thingthei kung phun tamnawn le kung tamnawn in hei cing kho usihlaw, a thei par kan zun khawh tikah khin cun kan sianghleirun pi hi Eden dum bantuk a si hnga.

CCU:           Um…ka kawi, na chim ve cang ah hin cun Eden dum a phan bal mi na lo ko cang hih.

Adam Hre: Aa…ziah! Bible ah Eden dum cu thingthei in pei a khat, ti a si kha.

Thingkung kan cin hnga i

thingkung nih a chuahpi mi

thli thiang cu minung nih

kan dawp lai, a theitlai zong

kan ei khawh fawn lai.   

Biadonghnak

CCU caah ka saduhthah ka ti tikah, “si hrimhrim seh” ti silo in “si kho seh law” tinak khi a si hnga. Taksa fimnak, thinlung fimnak le khuaruah tuaktan khawhnak in a kan hringtu kan nu CCU caah hin saduhthah mi tampi kan ngei cio ko lai. Cu bantuk cun kei zong nih CCU caah ka saduhthah cu ka rak phozar ve.

Ngaknu pakhat aa dawhnak cu pangpar tel lo in cun a tling mi dawhnak a si lo, an ti bang sianghleirun pi zong hi pangpar tel lo in cun a tling mi dawhnak a ngei bal lai lo ee….