Dawtnak Pathian
Laimi tampi nih Pathian kong kan i fian ning hi ruah a herh ngai ko tiah ka hmuh. Pathian cu dawtnak a si ti kan hngalh nain kan i fiang tak tak lo. Pathian kong kan theih mi a tam nain kan i fiang lo. Pathian cu dawtnak Pathian a si kan ti nain minung pakhat le pakhat kan i daw lo. Thla kan caam tik ah Khrihfa a si mi pumpak pakhat cio nih Pathian cu ka Pa, ka Pa tiah kan ti nain, Pathian fa a si mi pumpak pakhat cio tu cu kan i daw in kan i rem kho lo. Bible cawnpiak ning ah inn le pa cu mah le mah i dawt bantuk in kan i dawt ding a si nain kan i daw kho fawn lo. Cucaah dawtnak in a khat mi Pathian fa kan si nak ah kan lung put, kan ziaza le kan sining kan i zoh than a herh.
Jhn.3:16,“Cuticun Pathian nih vawlei hi a dawt hringhran caah a Fapa ngeihchungte kha a pek, cu caah a mah a zum mi paoh cu an thi lai lo zungzal nunnak an ngei lai”. Pathian nih a kan dawtnak cu Johan 3:16 ah hin aa fun tiah bible thiam sang hna nih an ti. Pathian dawtnak cu Paul nih hi ti hin a langhter, “Asinain Pathian nih cun zeitluk in dah a kan dawt kha hitihin a langhter: kan nih cu misual kan si ko rih lio ah hin Khrih cu kan caah a thi,” tiah Rom 5:8 ah a ti. Cucaah Khrihfa kan si nak le Pathian fa kan sinak ah hin a dingfal mi lawng va dawt si lo in mithmuh hrimhrim i a sual ko mi minung zong kha va dawt ding a si nak kha a kan cawn piak.
Jesuh Khrih a thawhthan hnu ah a zultu hna sinah aa langh lioah Jerusalem in vawleicung khua zakip ah ka thawngtha va chim u, a ti hna. Peter nih, Bawipa thihnak fak bik in an that mi hna sinah cun maw na thawngtha cu kan chim ko lai, tiah a hal. Jesuh nih cun, ka hmai ah cil a cha tu hna caah ka pennak chungah hmunhma a um ko, Ka lu ah hling luchin a ka chin tu hna caah sui luchin chiahpiak an si. Ka hnak fei in a ka chuunh tu hna caah ka thin lungah hmunhma ka chiah piak hna, tiah a ti. Jesuh Khrih nih a kan dawtnak ah Paul nih cun aa fiangtuk i hi tihin a langter (Rom 8:35), “Cucaah a ho nih dah Khrih dawtnak he cun a kan then khawh lai? Harnka nih maw, tenhinnak nih maw, hremnak nih maw, rawltamnak nih maw, thihnak nih maw, zeital nih a kan then kho hnga maw?” (Rom 8:37), “zeihmanh nih a kan then kho lai lo, hi thil vialte hna chung hin a kan dawtu thawngin kan nih cu teitu hna nak in teitu kan si deuh,” tiah a ti.
Martin Luther King, Jr nih cun, “Dawtnak a sullam hi thinlung cawlcanghnak in a chuak mi thil phun in ruah sual lo ding a si. Greek ca in tial mi Biakamthar ah hin dawtnak phunthum kan hmuh. Pakhatnak ah, ‘Eros’ timi dawtnak hi aa dawh mi thil phun, asiloah nungak le tlangval karlak I a um mi dawtnak phun a si. Plato langhter ningah cun ‘Eros’ cu thlarau nih Pathian a duhnak kong langhternak caah a hman. Pahnihnak ah ‘Philia’ timi dawtnak hi hawikom karlak I a um mi, pakhat nih dawt ruangah dawt than vemi dawtnak khi a si. Pathumnak cu ‘Agape’ dawtnak a si. Midang sining a hngalthiam piak tu, aa dang khun mi le mi vialte khamhnak a pe tu dawtnak a si. A khat in a khat mi dawtnak le a liam in a liam mi dawtnak a si i mi nih ra ka daw than ve hna seh timi ruahchan nak a ngei lomi dawtnak a si. Hi zawn ah hin, midang kan dawtnak hna a ruang cu kan duh hna caah a si lo, dawt an i hlawh ruang zongah a si lo. Mi zeipaoh kha kan dawtnak hna a ruang cu Pathian nih a dawt hna caah a si. Hi zawn ah hin thatlonak a tuah tu kha kan dawt, a sinain a tuah mi thatlonak kha cu kan huat,” tiah a ti.
Cu caah Pathian cu dawtnak a si i a dawtnak cu a dongkho lo, a ziam kho lo. A dawtnak cu a liam in a liam. Cu caah Pathian a fa le kan nih Laimi phun zongnih cubantuk a liam in a liam mi dawtnak cu kan i ngeih ve a herh. Pathian dawtnak hi ruat lengmang hna usih law nifatin kan nunnak ah hin Pathian sin in a ra mi dawtnak nun ah lam a kan hmuh sak ko lai.
Bibliography
Dr Siang Zi. Hmual Ngeimi Tahchunhnak 210. Yangon: privately printed, 2018.
Rung Lian, trans. Dawtnak Thazang. Yangon: n.p., 2018.
Comments
Post a Comment